මෙය පුංචි ප්‍රබන්ධිත කතාවකින් ඇරඹීම වඩා සුදුසු යැයි මා සිතමි. එකම ගෙදරක මවකට පුතුන් දෙදෙනෙක් විය. මේ මව, ඉඳහිට අළුවා සෑදීම පුරුද්දක් කරගෙන සිටියාය. ඇය අළුවා සෑදු හැම දිනකම එක පුතෙකුට අළුවා කෑලි 4ක් දී අනෙකාට එකඳු අළුවා කෑල්ලක් වත් නොදී සිටීයාය. අළුවා ලද පුතා සන්තෝසයෙන් අළුවා කෑ අතර අනෙකා එයට විරුද්ධව මව සමක කළහ කර ගත් මුත් ඔහුට කිසිවිටෙක අළුවා නොලැබිණි. පසුව මෙදෙස බලා නිහඬව තම අසන්තොසය පෙන්වා සිට ඉවත්වීම ඔහු පුරුද්දක් කර ගත්තාය. දැන් ප්‍රශ්නය වන්නේ ඇය, ඇයගේම එක් පුතෙකුට අළුවා කෑලි 4ක් ම දීම අගේ සිතින්ම ඇය සාධාරණී කරගෙන සිටීමයි. එයට හේතුව එම පුතා හට ඇයගේ තිබු අසීමිත ආදරයයි. ආදරය කරන කෙනාට පමණක් අළුවා දීම සාධාරණයයි ඇය සිතුවාය. මෙය මාස් පතා, වසර ගණනාවක් ම මේ ආකාරයටම සිදුවිය.
දිනක් කෙසේහෝ පියා වැඩ ඇරී කලින් නිවෙසට ආවිටෙක තම බිරිඳ කල දෑ දුටු පුතුන් ගේ පියා, ඒ පිලිබඳ කාරනා විමසා, නැවත එසේ නොකරන ලෙසට තම බිරින්දෑට අවවාද කළේය. ඇය ද ඔහු කියූ දෑ අනුමත කර ඉන්පසු දිනෙක අළුවා සෑදු විට මෙතෙක් අලුවා නො දුන් පුතනුවන්ට එක අලුවා කෑල්ලක් දී මෙතෙක් අලුවා කෑලි 4ක් දුන් පුතා හට අළුවා කෑලි 3ක් දුන්නාය. ප්‍රථම වතාවට අළුවා කෑලි ලත් පුතා අළුවා රස විඳීමට වඩා සන්තෝසයක් මව අළුවා කෑල්ලක් දීමට තීරණය කිරීම හේතු කොටගෙන සන්තෝස වුවාය.
නමුත් මේ සිද්ධියෙන් පසු මව ඉතා විශාල ගැටලුවකට මුහුණ දුන්නාය, ඒ මෙතෙක් අමනාප වී සිටි එක් පුතෙකු වෙනුවට දැන් පුතුන් දෙදෙනෙකුම ඇය අමනාප වී සිටීමයි. අළුවා කෑලි 4ක් ලත් පුතා තමනට එක අළුවා කෑල්ලක් අඩුවීම් හේතුවෙන් මව සමග කළහ කිරීමට පටන් ගැනීමත් සමගම එක් අළුවා කෑල්ලක් රස විඳි පුතා තවත් අළුවා ඉල්ලීමය. දැන් පුතුන් දෙදෙනාම ඇය සමග අමනාප වී ඇත.
දැන්, මෙහි සාධාරණ අසාධාරණ බව සිතා බැලීමට මා ඔබට ඉඩ ලබා දෙන්නෙමි.
මේ කාරනාව ප්‍රබන්ධ කතිකාවකින් ආරම්භ කිරීමට සිතුයේ, අද ශ්‍රී ලංකාවේ වර්තමාන දේශපාලන තත්වය හොඳින් තෝරා ගැනීමට ඔබට ඉඩ හැරීමටයි.
ශ්‍රී ලංකා දේශපාලන ඉතිහාසයේ 99%ක කාලයක් පුරාවටම රටේ ධනයෙන් 42%ක් භුක්ති විඳින 10%ක මිනිසුන් ප්‍රමාණයක් ආණ්ඩු බලය අල්ලාගෙන සිටි අතර ඉතිරි 90% කට කිසි විටෙක ආණ්ඩු බලය නොලැබී ඒ පිලිබඳ තම අසන්තොසය පළකරමින් නිහඬව සිටීමයි.
වසර 76කට පසු පොදු (90%) මිනිසුන් අතර සිටි එකෙකු පිරිවරාගත් පිරිසක් ආණ්ඩු බලය ලබා මාස කීපයක් යන්නටත් මත්තෙන් 99%ක කාලයක් ආණ්ඩු කල (10%ක) උන් කළහ කෝලහාල, තර්ජන ගර්ජන කරන්නට පටන් ගෙන තිබීමයි. මෙහි සාධාරණ අසාධාරණ බව සිතා බැලීමට මා ඔබට ඉඩ හරින්නෙමි.
මෙය අළුවා ලත් සහ අළුවා නොලත් සහෝදරයින්ගේ කතාවට ඉතා ආසන්න වන බව ඔබට ඉතා පහසුවෙන් අවබෝධ කර ගැනීමට හැකිවෙතැයි බලා පොරොත්තු වෙන අතර මෙය ශ්‍රී ලංකාවේ අද පවතින තත්වය පිලිබඳ විව්ර්තව සිතා බැලීමට ඔබට පහසුවක් වෙනු ඇතැයි බලාපොරොත්තු වෙමි.
සුමිත් ගුණතිලක ~