දැනට මාස කිහිපයකට පෙර, මම ජපානයේ ටෝකියෝ නගරයෙන් ක්යෝටෝ නගරයට යාම සඳහා අධිවේගී විදුලි දුම්රියකට (Shinkansen) ගොඩවුනෙමි. මෙම අධිවේගී විදුලි දුම්රියෙන් කි.මි 450 ක දුර යාමට ගතවෙන්නේ පැය 2 කුත් විනාඩි 15 කි. මේ ගමනේදී මා සමග එම මැදිරියේම 6 දෙනෙකුගෙන් යුත් බ්‍රිතාන්‍ය පවුලක් අසුන්ගෙන තිබෙනු දුටුවෙමි. ටිකට් පතේ සඳහන් තත්පරයටම පිටත්වූ දුම්රිය ගමනේ විනාඩි කිහිපයක් ඉක්මවුනා පමණි, යටකී බ්‍රිතාන්‍ය පවුලෙන් ඉතාමත් පැහැදිලි, කනස්සල්ලට පත් නොසන්සුන්තාවක් පෙනෙන්නට තිබුණි. හේතුව එම පවුලේ ගමන් මුලිකයාගේ (පියාගේ) එක ගමන් මල්ලක් දුම්රිය ආරම්භක පර්යන්ත වේදිකාවේ අසුනක අමතකව දමා ඒමයි. අවාසනාවකට මෙන් එම ගමන් මල්ලේ, පවුලේ සියලු දෙනාගේම ගුවන් ගමන් බලපත්‍ර, ගමන් මුලිකයාගේ මුදල්පසුම්බිය, ක්‍රෙඩිට් කාර්ඩ් ඇතුළු අනෙකුත් වටිනා ලියකියවිලි ද හර්ද රෝගියෙකු වන මුලිකයාගේ බේත් පෙතිද ඒ සමග මල්ලේ තිබීමයි.
දී තිබුන කාලසටහනට අනුව, එම දුම්රිය නැවත ටෝකියෝ නුවරට එන්නේ පැය 8 කට පසුවය. කලබලයට හා කනස්සල්ලට පත්වූ නඩය, හැම දුම්රියකම ගමන් ගන්නා අධිකාරී නිලධාරියෙකුගෙන් විමසු විට, ඔවුන් සනස්සවමින් කියා සිටියේ, ක්යෝටෝ වල සවාරී කටයුතු සතුටින් නිමකර, කලබල නොවී නැවත සවස ටෝකියෝ බලා යන ලෙසයි. තවද, එම නිලධාරියා සපථ කලේ “ඔබගේ ගමන් මල්ල නිරුපද්‍රිතව, තිබු තැනම, ඔබ එන තුරු බලා සිටුනු ඇති” යි යන්නයි.
ක්යෝටෝ විනෝද සවාරිය නිමවා (මා මේ කියන්නේ මා ගැනය, ඔවුන් ගැන නොවේ) අපි එම මැදිරියේම පැය 8කට පසු ටෝකියෝ දුම්රිය පොලට පැමිණියෙමු. අර බ්‍රිතාන්‍ය පවුලට අයත් ගමන් මල්ල, දමා ගිය මගී පර්යන්තයේ අසුන මතම, එලෙසෙම තිබෙනු දක්නා ලදී. ගමන් මල්ල අයිතිකරු මල්ල ලිහා බැලීමටවත් උත්සහා නොකොට සිනාමුසු මුහුණින්, ඉතාමත් කෘතඥ පුර්වකව වටපිටබලා දුම්රිය පොලින් පිටවෙනු දැකගත හැකිවිය.
ප්‍රශ්නය – ලංකාවේ, කොලබ කොටුවේ හෝ රටේ ඕනෑම දුම්රිය පොලක මෙවැනි සිද්ධියක අත්දැකීමක්, දුර්ලබද? සාමාන්‍ය සිදුවීමක්ද? ඉඳහිට හෝ සිදුවෙන්නක්ද?
ඔබේ අත්දැකීම් හා අදහස් ලියා එවන්න.