ඊනියා නිදහසින් පසු, අවුරුදු 76ක අදුරදර්ශී, පොදු මහත් ලාංකීය ජනතාවට අහිතකර, බොහෝවිට ප්‍රජාතන්ත්‍රවාදයේ ජන සාධනීය අනුලංඝනීය ප්‍රතිපත්ති වලට අහිතකර, පුද්ගල ස්වඋත්කර්ෂයට හා ලාභයට පමණක් ලොල්වූ, ජනතා චන්දයෙන් දේශපාලන අධිකාරිය ලබාගත්, දේශපාලුවන් විසින් ගත් විනාශකාරී ආර්ථික හා දේශපාලන තීන්දු නිසාවෙන් අසරණව, බංකොලොත්ව වියවුලෙහි වැටුන ලංකාව, බහුතරය නොවුනත්, චන්දය ප්‍රකාශ කල ජනතාවගෙන් චන්ද 42% දිනා මන්ත්‍රී ධුර 159 කින් යුත් ඔවුන්ගේම ප්‍රකාශයන්ටම අනුව දේශපාලන අධිකාරියේ බලය 2024 ජනාධිපතිවරණයෙන් හා මහාමැතිවරනයෙන් “ජවිපෙ” අනුර කුමාර දිසානායකගේ නායකත්වයෙන් පෙරමුණගත් ජාතික ජනබල වේගයේ රජයකට රාජ්‍ය පාලනය ලබාදුන්නේ බොහෝ බලාපොරොත්තු සහගතවය.
ජාතික ජනබලවේගයේ ජනාධිපතිද ඇතුළුව 2/3 බහුතර බලයක් හිමි රජයට අදට දින ( 8/02/2025) 86 ඉක්මවයි. පරිහානික සමාජයක්ව පවතී ලංකාව, නැවත ගොඩනගා හොඳ රාජ්‍ය පාලනයක් ස්ථාපිත කිරීම දින සියයකින් නොව දසක 3 කින්වත් කළහැකි කාර්යයක් නොවේ. ඒ ගැන අපට වෙන බොහෝ රටවල ආදර්ශ සමගද හොඳ අවභෝදයක් ඇත. ජනතාව ඉස්කෝලේ යැවීමට කලින්, ජනාධිපති, අගමැති, ඇමති මණ්ඩලය ඇතුළු සියලුම මන්ත්‍රීවරුන්, ජනතා මෙහවරක් සඳහා ප්‍රජාතන්ත්‍රවාදී රාජ්‍ය යහපාලනය ගැන පුර්ණ අවභෝදයක් ලබාගැනීමට අධ්‍යයන කටයුතු හා උපදෙස් ලබාගතයුතුය.
නමුත් අත්‍යන්තයෙන්ම වෙනස් කලයුතු, ජාතික බලවේගයේ මුල්පෙළ නායකයන්ගේම වහසි බස්වලින්ම කියනවානම් එක පෑන් පහරින් වෙනස් කළහැකි, වෙනස් කලයුතු , පහත දැක්වෙන පොදුමහත් ජනතාවට අහිතකර මර්ධන නීති අහෝසිකර සැබෑ ජනතා සුභසාධන ක්‍රියා පිළිවෙත් ක්‍රියාත්මක කර ඇත්ද?
- ත්‍රස්තවාදය වැළැක්වීමේ පනත
- හාල් පොල්ද ඇතුළුව අත්‍යාවශ්‍ය පාරිභෝගික භාණ්ඩවල මිල පාලනය
- විදුලි බිල 30% අඩුකිරීම
- වැරදි කරුවන් ලෙස ලංකාවේ ඉහලම උසාවියකින් නම්කළ ආර්ථික ඝාතකයින් 4 දෙනෙකු නීතිය හමුවට කැඳවා දඬුවම් පැමිණවීම
- පාස්කු ප්‍රහාරයද ඇතුළුව යුක්තිය අතපසුකල බොහෝ මාධ්‍ය ක්‍රියාකාරිකයින් ඇතුළු සිවිල් ක්‍රියාකාරිකයින් ගේ ඝාතන වලට යුක්තිය සහා සාධාරණය ඉටුකිරීම
දැනට ජාතික ජනබලවේගයේ රජයෙන්, අප අරගලයෙන් අපේක්ෂාකළ කලයුතු සාධනීය කිසිවක් තවමත් සිදුවී නොමැත, එනිසා වහසිබස් හා විලෝපනීය වෙනස්කම් වලට සීමා නොවී කඩිනමින් කලයුතු සාධනීය වෙනස් කම් “පාර රාජ්‍ය පාලනය” අභිබවා කලයුතුය. සැබෑ සාධනීය ජනතාවාදී වෙනසක් කිරීමේ ගෞරවය අත්කරගැනීම හෝ වෙන කාටවත් දොස් නොදී හෝ ඉතිහාසයේ කුණුබක්කිය තෝරාගැනීම අසීමිත විධායක බලැති ජනාධිපති අනුර කුමාර දිසානායක ඇතුළු ජාතික ජනබලවේග රජය සතුය.